Музеі прыцягваюць наведвальнікаў прадстаўленымі ў іх экспазіцыях арыгіналамі. Аднак бывае і так, што падробка з часам набывае гісторыка-культурнае значэнне і займае годнае месца ў музейнай вітрыне.
У экспазіцыі Краязнаўчага музея ўважлівы наведвальнік знойдзе фальшывы шылінг Лівонскага ордэна - невялікую медную манету дыяметрам 19 мм, чаканеную, верагодна, у Полацку ў сярэдзіне XVI ст. На аверсе яе намаляваны малы герб Рэвеля, на рэверсе - ордэнскі крыж. Менавіта з вытворчасцю фальшывых лівонскіх шылінгаў звязана меркаванне даследчыкаў пра існаванне ў нашым горадзе першага беларускага манетнага двара. На карысць гэтага кажа аб'ём вытворчасці фальшываманетчыкаў. Толькі па адным сведчанні канца XV ст., было адчаканена больш за 800 тыс. манет.
Падробныя манеты Лівонскага ордэна сустракаюцца як адзінкавымі экземплярамі, так і ў скарбах. Адзін з іх быў знойдзены ў Полацку ў 1997 г. Арыгінальныя манеты чаканіліся з білону (непаўнавартаснае срэбра), у той час як фальшываманетчыкі выкарыстоўвалі медзь, латунь і срэбра. Гэтак жа як і на манетных дварах Лівоніі, чаканка фальшывак вялася неспалучанымі штэмпелямі - ніжні штэмпель быў замацаваны ў спецыяльнай падстаўцы, а верхні чаканшчык трымаў у руцэ, настаўляючы яго на падкладзеную нарыхтоўку. Гэтыя манеты маюць аднолькавы з арыгіналам памер, але адрозніваюцца масай, у тым ліку і паміж сабой.
Прага нажывы была такой моцнай, што вытворцаў падробак не спалохала нават жорсткая расправа над адным з фальшываманетчыкаў (па іншай версіі, збытчыкаў) у Рэвелі: няшчасны быў жыўцом звараны ў катле кіпячага алею.
